कोरोनाप्रतिबंधक लस घेऊनही अनिल विज यांना कोरोना संसर्ग; भारत बायोटेकने दिले स्पष्टीकरण

चंढिगड : हरियाणाचे आरोग्यमंत्री अनिल विज यांना कोरोना झाल्याचे अहवालातून समोर आले आहे. यामुळे एकच खळबळ उडाली होती. याचे कारणही असेच आहे. हरियानाचे आरोग्यमंत्री अनिल विज यांनी कोरोना लसीच्या तिसऱ्या टप्प्याच्या चाचणीसाठी स्वयंसेवक म्हणून डोस घेतला होता. मात्र तरीही अनिल विज कोरोना पॉझिटिव्ह आढळले आहेत. २० नोव्हेंबर रोजी कोव्हॅक्सिनच्या तिसऱ्या टप्प्याच्या चाचणीत त्यांनाही ही लस देण्यात आली होती. त्यामुळे कोव्हॅक्सिनची ही लस परिणामकारक आहे का असा प्रश्न उपस्थित होत आहे.

त्यामुळे भारत बायोटेकच्या कोवॅक्सिन लसीबाबत साशंकता निर्माण झाली होती. मात्र याबाबत आता भारत बायोटेकने स्पष्टीकरण दिलं आहे. भारत बायोटेकने याबाबत ट्वीट करत माहिती दिली की, कोवॅक्सिन लसीची क्लिनिकल ट्रायल दोन डोसवर आधारित आहे. त्यासाठी 28 दिवसांचा कालावधी आहे. लसीचा परिणाम दुसरा डोस घेतल्यानंतर 14 दिवसांनी निश्चित होणार आहे. कोवॅक्सिन लस दोन डोस दिल्यानंतर प्रभावी ठरते. तिसऱ्या टप्प्यातील चाचणीत 50 टक्के स्वयंसेवकांना कोवॅक्सिन लस तर इतरांना प्लेसबो (डमी लस) देण्यात आला होता.

चाचणीमध्ये निम्म्या स्वयंसेवकांना लस आणि निम्म्या स्वयंसेवकांना प्लेसबो देण्यात आला. मात्र स्वयंसेवकांना याबाबत माहिती दिली जात नाही. तसेच लसीचे दोन डोस घेणे आवश्यक असते. त्यानंतर शरीरात अँटिबॉडीज् तयार होत असतात.” असेही भारत बायोटेकने स्पष्ट केले आहे. दरम्यान, 20 नोव्हेंबर रोजी हरियाणामध्ये कोवॅक्सिनच्या तिसऱ्या टप्प्यातील चाचणी सुरु झाली होती. यावेळी अनिल विज यांनी पहिला डोस देण्यात आला होता. विज यांच्यासोबत 200 स्वयंसेवकांना कोरोना लसीचा पहिला डोस दिला होता. यानंतर 28 दिवसांनी त्यांना कोरोना लसीचा दुसरा डोस देण्यात येणार आहे. परंतु दुसरा डोस घेण्याच्या आधीच त्यांना कोरोनाची लागण झाली आहे.