सध्याच्या धावपळीच्या जीवनशैलीत अनियमित आहार आणि तासनतास बसून काम करण्यामुळे लठ्ठपणा ही सर्वसामान्य समस्या बनली आहे. वजन वाढल्याने आत्मविश्वासावर परिणाम होतोच, पण त्यासोबत डायबेटीस, हृदयरोग आणि उच्च रक्तदाबासारख्या गंभीर आजारांचेही दार उघडले जाते. त्यामुळे अनेकजण वजन कमी करण्यासाठी डाएट आणि व्यायामाचा मार्ग स्वीकारतात, पण त्यात काही चुका केल्याने अपेक्षित परिणाम मिळत नाहीत.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
त्यापैकी एक मोठी चूक म्हणजे योग्य फळांची निवड न करणे. सर्व फळे आरोग्यासाठी फायदेशीर असली तरी काही फळांमध्ये नैसर्गिक साखर आणि कॅलरीचे प्रमाण जास्त असते, त्यामुळे ते वजन कमी करण्याऐवजी वाढवू शकतात. जाणून घ्या अशी कोणती फळे आहेत जी वजन कमी करताना टाळायला हवीत आणि त्याऐवजी कोणती फळे खाल्ल्यास फायदेशीर ठरेल.
आंबा गोडसर आणि स्वादिष्ट असतो, मात्र, त्यामध्ये नैसर्गिक साखरेचे प्रमाण खूप जास्त असते, त्यामुळे त्याचे प्रमाणाबाहेर सेवन केल्यास रक्तातील साखरेचे प्रमाण वाढू शकते आणि वजन कमी करण्याच्या प्रक्रियेला अडथळा निर्माण होऊ शकतो. आंब्यामध्ये विटॅमिन C आणि अँटीऑक्सिडंट्स असले तरी, वजन कमी करताना त्याचे प्रमाण मर्यादित ठेवणे आवश्यक आहे. आंबा खायचा असेल तर तो कमी प्रमाणात खा. त्याला स्ट्रॉबेरी, ब्लूबेरी किंवा सफरचंदासोबत मिसळून खाल्ल्यास त्याचा प्रभाव कमी होतो.
द्राक्षे दिसायला लहान असली तरी त्यामध्ये ग्लायसेमिक इंडेक्स जास्त असल्याने ती रक्तात पटकन साखर मिसळतात, ज्यामुळे शरीरातील फॅटचे प्रमाण वाढू शकते. सतत द्राक्षे खाल्ल्यास वजन कमी करण्याच्या प्रक्रियेला मर्यादा येऊ शकते. त्याऐवजी फायबरयुक्त फळे जसे सफरचंद किंवा नाशपती खाल्ल्यास जास्त फायदा होतो. द्राक्षांचे प्रमाण अत्यल्प ठेवावे आणि संपूर्ण दिवसात मर्यादित प्रमाणातच सेवन करावे.
चेरी हे अँटीऑक्सिडंट्स आणि विटॅमिन C ने समृद्ध असलेले फळ आहे, पण त्यातही साखरेचे प्रमाण खूप जास्त असते. खूप प्रमाणात चेरी खाल्ल्यास शरीरातील रक्तातील साखरेचे प्रमाण वाढते, त्यामुळे वजन कमी करताना त्याचे सेवन मर्यादित ठेवणे गरजेचे आहे. चेरी खाण्याऐवजी स्ट्रॉबेरी, ब्लूबेरी किंवा रास्पबेरी यासारखी कमी कॅलरी आणि जास्त फायबर असलेली फळे निवडावीत.
केळे ऊर्जा देणारे फळ आहे, मात्र त्यातील कार्बोहायड्रेट्सचे प्रमाण जास्त असल्याने वजन कमी करताना ते मर्यादित प्रमाणात खाणे गरजेचे आहे. जरी त्यात फायबर आणि पोटॅशियम असले तरी कमी कॅलरी असलेल्या फळांच्या तुलनेत त्याचा जास्त वापर वजन कमी करण्याच्या प्रक्रियेला बाधा आणू शकतो. जर केळे खायचेच असेल तर छोटे केळे खा आणि ते इतर कमी कॅलरीच्या फळांसोबत खा. पपई, संत्रे किंवा सफरचंद यांना पर्याय म्हणून निवडू शकता.
लिची हे उन्हाळ्यात मिळणारे गोडसर आणि रसदार फळ आहे, पण त्यात फ्रक्टोजचे प्रमाण जास्त असते, जे फॅटच्या संचयाला कारणीभूत ठरू शकते. त्यामुळे वजन कमी करण्याच्या प्रयत्नात असाल तर लिची खाण्याचे प्रमाण नियंत्रित असायला हवे. लिची खाण्याऐवजी सफरचंद, नाशपती किंवा पेरू खाल्ल्यास फायबर अधिक मिळते आणि रक्तातील साखर नियंत्रित राहते.
कलिंगड हे उन्हाळ्यातील हायड्रेटिंग आणि हलके फळ आहे, पण त्याचा ग्लायसेमिक इंडेक्स जास्त असल्याने ते रक्तातील साखर वेगाने वाढवते. कलिंगड खाल्ल्यावर लवकर भूक लागते आणि त्यामुळे अतिरिक्त खाण्याची सवय लागू शकते. कलिंगड खाण्याचे प्रमाण मर्यादित ठेवावे आणि ते इतर फायबरयुक्त फळांसोबत खाल्ल्यास जास्त फायदेशीर ठरेल.
फळे आपल्या आरोग्यासाठी खूप लाभदायक असतात पण वजन कमी करताना काही फळांचे जास्त सेवन करणे चांगले नसते. आंबा, द्राक्षे, चेरी, केळी, लिची आणि कलिंगड यांसारख्या फळांमध्ये कॅलरीज आणि साखर जास्त असते, त्यामुळे त्यांचे जास्त सेवन केल्याने वजन वाढण्यास मदत होते. वजन कमी करण्यासाठी तुमच्या आहारात फायबर आणि लो-कॅलरी फळांचा समावेश करा जसे की सफरचंद, नाशपाती, ब्लूबेरी आणि स्ट्रॉबेरी.
