मुंबई : ठाकरे सरकारने (Thackeray Government) मोठा निर्णय घेतलाय. मुंबई महापालिकेची निवडणूक तोंडावर आलेली असताना बृहन्मुंबई महानगरपालिकेवर (Mumbai Municipal Carporation) प्रशासकाची (Administrator) नियुक्ती करण्याचा निर्णय घेण्यात आलाय. मुंबई महानगरपालिका अधिनियमात सुधारणा करण्यास आज झालेल्या मंत्रिमंडळ बैठकीत मान्यता देण्यात आली.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
आज मंत्रिमंडळाची बैठक पार पडली. या बैठकीच्या अध्यक्षस्थानी मुख्यमंत्री उद्धव ठाकरे होते. बृहन्मुंबई महानगरपालिकेची मुदत 7 मार्च 2022 रोजी संपत आहे. परंतू राज्यात कोविडची आपत्ती त्याचप्रमाणे बृहन्मुंबई महानगरपालिकेच्या सदस्य संख्येत केलेली वाढ आणि त्यामुळे झालेली प्रभागांची पुनर्रचना यामुळे ही निवडणूक घेणे शक्य होणार नसल्याने प्रशासक नियुक्ती करण्याची सूचना राज्य निवडणूक आयोगाने केली होती.
सद्यस्थितीत प्रशासक नियुक्तीबाबत मुंबई महानगरपालिका अधिनियम 1988 मध्ये कोणतीही तरतूद नाही, त्यामुळे ही सुधारणा करण्यासाठी अध्यादेश प्रख्यापित करण्यात येईल. प्रशासकाची नियुक्ती ही आगामी सार्वत्रिक निवडणुकीनंतर होणाऱ्या महानगरपालिकेच्या पहिल्या सभेच्या दिनांकापर्यंत लागू राहील.
निवडणूक पुढे ढकलणार?
मुंबई महापालिकेची निवडणूक तोंडावर आलेली आहे. परंतु कोरोनाचे केसेस कधी कमी कधी जास्त होतायत. त्याच पार्श्वभूमीवर राज्य सरकारने मुंबई महापालिकेवर प्रशासक नेमण्याचा निर्णय घेतला आहे. हा निर्णय घेतल्याने निवडणूक पुढे ढकलली जाण्याची शक्यता आहे.
