नवी दिल्ली : डिसेंबरपर्यंत सर्वांना कोरोनावरील लस मिळणार असल्याचे प्रतिप्रादन भाजपचे राष्ट्रीय अध्यक्ष जे पी नड्डा यांनी बुधवारी केले आहे. डिसेंबर पर्यंत प्रत्येक नागरिकाला लस उपलब्ध करुन दिली जाईल असे त्यांनी म्हटले आहे. भाजपच्या खासदारांशी चर्चा करत नड्डा यांनी व्हिडिओ कॉन्फरन्सिंगद्वारे देशभरातल्या परिस्थितीचा आढावा घेताना काँग्रेसने लोकांमध्ये भीती निर्माण केल्याचेही म्हटले.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
पंतप्रधान मोदी यांनी सर्व राज्यांना आणि मुख्यमंत्र्याना मार्च महिन्यातच कोरोना दुसरी लाट येण्याअगोदरच सर्व तयारी करण्यास सांगितले होते. भारताने फक्त ९ महिन्यातच दोन भारतीय लसी कोव्हिशिल्ड आणि कोवॅक्सिन तयार केल्या. आतापर्यंत १८ कोटी पेक्षा जास्त भारतीयांनी त्या घेतल्या आहेत. डिसेंबरच्या शेवटी सर्व देशातल्या नागरिकांना लस देण्यात येईल यासाठी वेळ निश्चित केली जात आहे, असे नड्डा यांनी सांगितले.
केंद्रातील मोदी सरकारने ऑक्सिजन आणि रेमडेसीविरची उपलब्धता आणि पुरवठा सुनिश्चित केला आहे. सर्व राज्यांना आवश्यक मदत पाठविली जात आहे. टूल किटने काँग्रेसचा खरा चेहरा समोर आणला आहे. करोनाच्या काळातही देशात अराजकता पसरविण्याचा प्रयत्न केला जात आहे. पंतप्रधान मोदी अविरतपणे देशातील जनतेची सेवा करीत आहेत आणि काँग्रेस लोकांमध्ये संभ्रम पसरवून भीती निर्माण करत आहे, असे नड्डा म्हणाले.
