रावळपिंडीत १०० वर्ष जुन्या हिंदू मंदिराची तोडफोड
बातमी विदेश

रावळपिंडीत १०० वर्ष जुन्या हिंदू मंदिराची तोडफोड

रावळपिंडी : पाकिस्तानच्या रावळपिंडी शहरामध्ये तब्बल १०० वर्ष जुन्या हिंदू मंदिरात तोडफोड करण्यात आल्याची घटना घडली आहे. इंडियन एक्सप्रेसनं दिलेल्या वृत्तानुसार रावळपिंडीच्या पुराना किला परिसरामध्ये हा प्रकार घडला आहे. या मंदिराच्या डागडुजीचं काम सुरू असताना ही तोडफोड करण्यात आली असून तोडफोड करणारांचा शोध पोलीस घेत आहेत.

गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा

शनिवारी संध्याकाळी ७.३०च्या सुमारास मंदिराजवळ १० ते १५ लोकांचा जमाव आला आणि त्यांनी मंदिराचं मुख्य द्वार आणि वरच्या मजल्यावरील इतर दरवाजांचं नुकसान केलं. तसेच, मंदिराच्या पायऱ्यांचं देखील त्यांनी नुकसान केल्याचं देखील पोलीस तक्रारीत म्हटलं आहे. या तक्रारीनुसार मंदिरामध्ये गेल्या महिन्याभरापासून डागडुजीचं काम सुरू होतं. मंदिराच्या परिसरात काही प्रमाणात अतिक्रमण देखील झालं होतं. काही माफियांनी हा परिसर ताब्यात घेतला होता. २४ मार्च रोजी हे अतिक्रमण हटवण्यात आलं आणि डागडुजीचं काम सुरू झालं. मात्र, डागडुजीचं काम सुरू असल्यामुळे मंदीर परिसरात कोणतेही पूजा विधी होत नव्हते. तसेच, मंदिरात कोणतीही मूर्ती देखील नव्हती.

इव्हॅक्यू ट्रस्ट प्रॉपर्टी बोर्डचे सुरक्षा अधिकारी सैय्यद रझा अब्बास झैदी यांनी बन्नी पोलीस स्थानकात या प्रकाराविरोधात गुन्हा दाखल केला आहे. मंदिराचे व्यवस्थापक ओम प्रकाश यांनी दिलेल्या माहितीनुसार असा प्रकार घडल्याची माहिती मिळताच पोलीस घटनास्थळी दाखल झाले आणि त्यांनी परिस्थिती नियंत्रणात आणली.