नांदेड : नांदेड शहराच्या इतवारा पोलीस ठाण्याच्या हद्दीत राहणाऱ्या काँग्रेसच्या महिला कार्यकर्त्यावर बाफना टी पॉइंटजवळ असलेल्या उड्डाणपुलावर सोमवारी रात्री अकराच्या सुमारास गोळीबार करण्यात आला. यात महिलेच्या डाव्या दंडातून गोळी आरपार गेली. त्यांच्यावर शासकीय रुग्णालयात उपचार सुरू आहेत. इतवारा पोलीस निरीक्षक भगवान धबडगे यांना ही माहिती मिळताच त्यांनी आपल्या सहकाऱ्यांसह घटनास्थळ गाठले. घटनेचे गांभीर्य ओळखून पोलीस अधीक्षक श्रीकृष्ण कोकाटे, अतिरिक्त पोलीस अधीक्षक अविनाशकुमार, पोलीस उपविभागीय अधिकारी (इतवारा) डॉ. सिद्धेश्वर भोरे यांना ही माहिती दिली. वरिष्ठ अधिकाऱ्यांनीही घटनास्थळी पाहणी करून रुग्णालयात जाऊन जखमी सविता गायकवाड यांची भेट घेतली.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
याबाबत पोलिसांनी माहिती दिली आहे. सविता गायकवाड आणि अतीक नावाच्या एका व्यक्तीविरुद्ध आयशर खरेदी विक्रीच्या प्रकरणात भोकर पोलीस ठाण्यात चोरीचा गुन्हा दाखल करण्यात आला होता. या प्रकरणात अतीक याला पोलिसांनी अटकही केली होती. मात्र, सविता गायकवाड यांना १४ (१) (अ) नुसार नोटीस देऊन सोडण्यात आले होते. या प्रकरणात परभणी येथील रहीम खान याने साक्ष दिली होती. याचा राग मनात असल्याने सात जानेवारी रोजी सविता गायकवाड आणि फैसल हे दोघेजण परभणीला गेले. साक्षीदार रहीम खान याच्या घरात जावून त्यांनी विचारणा केली. रहीम खान याच्या घरात त्यांनी गोंधळही घातल्याचे सांगण्यात आले.
नांदेड शहरातील शक्तीनगर भागात राहणाऱ्या सविता गायकवाड ह्या रात्री आपल्या दुचाकीवरून मगनपुरा येथे अकराच्या सुमारास जात होत्या. यावेळी त्यांची दुचाकी सव्वाअकराच्या दरम्यान बाफना उड्डाणपूलाजवळ येताच त्यांच्या पाठीमागून एका दुचाकीवरून तीन जण आले. यात रहीम खान आणि जफर या परभणीच्या दोघांसह आणखी एक जण होता. त्यांनी सविता गायकवाड यांना थांबवले. ओळख असल्यामुळे सविता गायकवाड थांबल्या. यावेळी त्यांनी वाद घालून आपल्या जवळील पिस्तूलमधून सविता गायकवाड यांच्यावर गोळी घातली. या घटनेत सविता गायकवाड यांच्या डाव्या दंडातून गोळी आरपार बाहेर पडली आणि त्या जखमी झाल्या. यानंतर हल्लेखोर पसार झाले.
