बातमी विदेश

Russia Ukraine War : युक्रेनमध्ये केवळ पाण्यावर त्यानं काढले चार दिवस

कीव्ह: रशिया युक्रेन युद्धाचा आजचा आठवा दिवस आहेत. युक्रेनमध्ये अडकून पडलेले अनेक भारतीय नागरिक आणि विद्यार्थी मायदेशात मोठ्या कष्टानं पोहचू शकलेत. अनेक विद्यार्थी आपल्या कहाण्या व्यक्त करताना थकत नाहीत. अशाच विद्यार्थ्यांपैंकी एक विद्यार्थी आहे उत्तर प्रदेशचा रहिवासी असलेला शिवम ठाकूर… शिवम भारतात परतला असला तरी हा प्रवास त्याच्यासाठी सोप्पा नव्हता. भारतात दाखल होण्यापूर्वी युक्रेनमध्ये त्याला अन्नाशिवाय चार दिवस काढावे लागले. या चार दिवसांत पोटात ढकलायला केवळ पाणी उपलब्ध झाल्याचं शिवमनं म्हटलंय.

गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा

बुधवारी उत्तर प्रदेशच्या लोनीचा मूळ रहिवासी असलेल्या प्रमोद ठाकूर यांचा आनंद गगनात मावेनासा झाला होता. कारण रशिया युक्रेन युद्धादरम्यान युक्रेनमध्ये अडकून पडलेला त्यांचा मुलगा शिवम गाझियाबादमध्ये सुखरुप परतला होता. शिवम हंगेरीतील बुडापेस्ट विमानतळावरून विशेष विमानानं मंगळवारी रात्री उशिरा दिल्लीला पोहोचला. तिथून बुधवारी पहाटे तो लोणी इथं आपल्या घरी पोहोचला. शिवम घरी आल्यानं कुटुंबीय अतिशय आनंदी आहेत. मुलला सुखरुप भारतात आल्याबद्दल शिवमच्या वडिलांनी भारत सरकारचे आभार मानले आहेत.

शिवम युक्रेनमधील उझारोद इथं एमबीबीएसचं शिक्षण घेत होता. रशियानं युक्रेनवर केलेल्या हल्ल्यानंतर परिस्थिती बिघडल्यानं तो मायदेशी परतण्यासाठी तयार झाला. त्यानं २६ फेब्रुवारीचं विमान तिकीटही काढलं. त्यापूर्वी, २४ फेब्रुवारी रोजच युद्ध सुरू झालं.

ज्या दिवशी युद्ध सुरू झालं तेव्हा शिवमच्या तिथल्या राहण्याच्या ठिकाणी दोन दिवसांचं अन्न शिल्लक होतं. हेच अन्न शिवमनं आपल्या काही मित्रांसोबत वाटून खाल्लं. परंतु, हॉस्टेलमधलं अन्न संपल्यानंतर मात्र त्यांना उपाशीपोटीच राहावं लागलं. पहिले काही दिवस शिवम मित्रांसोबत वसतिगृहाच्या बंकरमध्येच राहिला. उपाशीपोटी पोलंडच्या मार्गानं भारतात जाण्याची तयारी केली मात्र त्याला पोलंडमध्ये प्रवेश मिळाला नाही आणि त्याला पुन्हा उझोरोदला यावं लागलं.

चार दिवस अन्न न खाता तो फक्त पाण्यावर जगला. सोमवारी रात्री शिवमनं हंगेरीला जाण्यासाठी बस पकडली आणि सकाळी ७ वाजता हंगेरीतील बुडापेस्टला पोहोचला. इथे भारतीय दूतावासाकडून त्याला जेवण मिळालं. तसंच दूतावासानं शिवम आणि इतर विद्यार्थ्यांची राहण्याचीही व्यवस्था केली होती. त्यानंतर या विद्यार्थ्यांना सुखरुप विमानतळावर आणण्यात आलं, अशी थरारक आठवण शिवमनं व्यक्त केलीय.

…आणि कुटुंबीयांच्या जीवात जीव आला

र, युद्ध सुरू झाल्यापासून मुलाच्या चिंतेनं शांत झोप लागली नाही, अशी व्याकूळता शिवमच्या वडिलांनी व्यक्त केली. मंगळवारी मुलगा रात्री विमानानं भारताला रवाना होत असल्याचं समजलं आणि मगच त्यांच्या जीवात जीव आला. सकाळी मुलाला प्रत्यक्षात सुखरुप घरी आलेलं पाहून कुटुंबीयांना अश्रू अनावर झाले.

 

Leave a Reply

Your email address will not be published.