मुंबई : मंत्रिमंडळ विस्तारानंतर झालेल्या खातेवाटपात शिंदे गटाच्या तुलनेत भाजपला महत्त्वाची खाती मिळाली आहेत. शिंदे गटातील अनेक मंत्र्यांची दुय्यम खाती देऊन बोळवण करण्यात आल्याची चर्चा आहे. या पार्श्वभूमीवर आता संबंधित मंत्र्यांमध्ये नाराजी असून शिंदे गटाचे ३ कॅबिनेट मंत्री आपल्याला मिळालेल्या खात्याबाबत खूश नसल्याची माहिती समोर येत आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
मनाजोगी महत्त्वाची खाती न मिळाल्याने मुख्यमंत्री एकनाथ शिंदे यांच्या गटातील दादा भुसे, संदीपान भुमरे आणि दीपक केसरकर हे नाराज असल्याचे समजते. बंदरे आणि खनिकर्म हे दुय्यम दर्जाचे खाते दिल्यानं दादा भुसे सर्वाधिक नाराज असल्याचं सांगितलं जात आहे. तर दुसरीकडे रोजगार हमी, फलोत्पादन हे जुनेच खाते मिळाल्यानं संदीपान भुमरेही नाराज आहेत. त्यासोबतच शालेय शिक्षण हे खाते मिळूनही दीपक केसरकर हे फारसे खूश नसून केसरकरांना अधिक महत्त्वाचे खाते मिळण्याची अपेक्षा होती.
थेट कॅबिनेट मंत्र्यांचीच नाराजी समोर येऊ लागल्याने मुख्यमंत्री शिंदे यांची डोकेदुखी वाढण्याची शक्यता आहे. एकनाथ शिंदे यांनी शिवसेना पक्षप्रमुख उद्धव ठाकरे यांना आव्हान देत पक्षातून बंडखोरी केली. मात्र आता बंड करताना सोबत आलेले नेतेच नाराज होऊ लागल्याने त्यांची नाराजी दूर करायची तरी कशी, असा प्रश्न शिंदे यांच्यासमोर निर्माण झाला आहे.
शिंदे गटातील कोणाला कोणते खाते मिळाले?
खातेवाटपात मुख्यमंत्री एकनाथ शिंदे यांनी उदय सामंत यांच्याकडे राज्याच्या उद्योग खात्याची जबाबदारी दिली आहे, तर गुलाबराव पाटील यांना अपेक्षेनुसारच पाणीपुरवठा व स्‍वच्छता हे खातं देण्यात आलं आहे. कृषी खाते थेट अब्दुल सत्तार यांच्याकडे सोपवण्यात आलं आहे. त्याशिवाय संजय राठोड यांना अन्न व औषध प्रशासनाची जबाबदारी दिली आहे. प्रा. तानाजी सावंत यांच्याकडे सार्वजनिक आरोग्‍य व कुटुंब कल्‍याण हे खाते असेल. तर शंभूराज देसाई यांच्याकडे राज्‍य उत्‍पादन शुल्‍क हे खाते असणार आहे.
भाजपमधीलही दोन दिग्गजांच्या पदरी निराशा
नव्या शिंदे सरकारमध्ये धक्कातंत्र पाहायला मिळेल, अशी चर्चा राजकीय वर्तुळात सुरू असतानाच रविवारी झालेल्या खातेवाटपात नवे धक्कातंत्र दिसून आले. भाजपचे ज्येष्ठ नेते चंद्रकांत पाटील आणि सुधीर मुनगंटीवार यांना तशी कमी महत्त्वाची खाती देण्यात आली आहेत. चंद्रकांत पाटील यांच्याकडे उच्च व तंत्रशिक्षण, वस्त्रोद्योग आणि संसदीय कार्य या विभागाची जबाबदारी देण्यात आली आहे. तर सुधीर मुनगंटीवार यांच्याकडे वने, सांस्कृतिक कार्य आणि मत्‍स्‍य व्यवसाय ही खाती जाहीर करण्यात आली आहे.
