गुजरात: सध्या गुजरात निवडणुकीसाठी जोरदार प्रचार सुरु असलेला पाहायला मिळत आहे. या प्रचारांमध्ये भारताचा अष्टपैलू क्रिकेटपटू रवींद्र जडेजाचे कुटुंब चर्चेचा विषय आहे. यामागील कारण म्हणजे गुजरात विधानसभा निवडणुकीत जामनगर उत्तर मतदारसंघातून भाजपने रवींद्र जडेजाची पत्नी रिवाबा जडेजा यांना उमेदवारी दिली आहे. तर दुसरीकडे, रवींद्र जडेजाची बहीण नयनाबा काँग्रेस उमेदवाराच्या बाजूने प्रचारात व्यस्त आहेत.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
रवींद्र जडेजाची पत्नी आणि बहीण यांच्यातील आरोप-प्रत्यारोपांची मालिका थांबण्याचे नाव घेत नाही आहे. रवींद्र जडेजाची बहीण नयनाबा हिने रिवाबा जडेजावर आता नवा आरोप केला आहे. फक्त आरोप न करता तिने आपल्या वाहिनीची तक्रार देखील केली आहे.
गेल्या मंगळवारी नयनाबा यांनी पत्रकार परिषदेत रिवाबा निवडणुकीच्या प्रचारासाठी लहान मुलांचा वापर करत असल्याचे सांगितले, जे चुकीचे आहे. निवडणूक प्रचारात लहान मुलांचा वापर केल्याप्रकरणी काँग्रेसने रिवाबाविरोधात तक्रार दाखल केली आहे. नयनाबा म्हणाल्या, “रिवाबा सहानुभूती मिळवण्यासाठी लहान मुलांचा वापर करत आहे. एकप्रकारे याला बालमजुरी म्हणतात. याप्रकरणी काँग्रेसच्या वरिष्ठ अधिकाऱ्यांनी निवडणूक आयोगाकडे तक्रार केली आहे.”
जामनगर उत्तरमधून रिवाबा जडेजा निवडणूक लढवणार
राजकोट पश्चिम येथील मतदार असूनही रिवाबा जामनगर उत्तरमध्ये निवडणूक लढवून मते कशी मागू शकतात, असा आरोपही नयनाबा यांनी केला. नयनाबाने असेही सांगितले की, तिच्या निवडणूक फॉर्ममध्ये तिच्या वहिनीचे अधिकृत नाव रेवा सिंग हरदेव सिंग सोलंकी आहे. जडेजाचे आडनाव वापरण्यासाठी तिने आपल्या नावासोबत रवींद्र जडेजाचे नाव कंसात टाकले आहे. नयनाबा म्हणाल्या की, लग्नाच्या सहा वर्षांत रिवाबाला नाव सुधारण्यासाठी पुरेसा वेळही मिळाला नाही.
जडेजाची बहीण काँग्रेसच्या प्रचारात
रवींद्र जडेजाच्या कुटुंबातील दोन महिला सदस्य (त्याची पत्नी आणि त्याची बहीण) जामनगर उत्तर मतदारसंघात समोरासमोर आल्या आहेत, जिथे भारताच्या अष्टपैलू खेळाडूची पत्नी भाजपच्या तिकिटावर निवडणूक लढवत आहे, तर त्याची बहीण जामनगरमधून विरोधी पक्ष काँग्रेसचा प्रचार करत आहे. तत्पूर्वी, नयनाबाने दावा केला होता की, तिच्या वाहिनीची गुजरात विधानसभा निवडणूक जिंकण्याची शक्यता कमी आहे. कारण ती एक ‘सेलिब्रेटी’ आहे आणि जामनगरच्या लोकांना स्थानिक नेत्याने त्यांचे प्रतिनिधित्व करत त्यांची कामे पूर्ण करावी अशी इच्छा आहे.
जामनगर उत्तर ही अशा ८९ विधानसभा जागांपैकी एक आहे; जिथे १ डिसेंबर रोजी मतदान होणार आहे. १० नोव्हेंबर रोजी भाजपने विद्यमान आमदार धर्मेंद्र सिंह जडेजा यांच्या जागी रिवाबा जडेजा यांना उमेदवारी दिली. तेव्हापासून रिवाबा निवडणुकीच्या प्रचारात व्यस्त आहेत.
