राष्ट्रीय लोकदलाचे प्रमुख अजित सिंह यांचं कोरोनामुळे निधन

नवी दिल्ली : कोरोनाचा प्रादुर्भाव मोठ्या प्रमाणात वाढला आहे. यामध्ये अनेकांना प्राण गमवावे लागत आहेत. अशात राष्ट्रीय लोकदलाचे प्रमुख आणि माजी केंद्रीय मंत्री अजित सिंह यांचं कोरोनामुळे निधन झालं आहे. ते ८२ वर्षांचे होते.

उत्तर प्रदेशातील मोठे नेते असणाऱ्या अजित सिंह यांची फुफ्फुसांचा संसर्ग झाल्याने प्रकृती ढासळली होती. यानंतर त्यांना गुरुग्राममधील खासगी रुग्णालयात दाखल करण्यात आलं होतं. दरम्यान २० एप्रिल रोजी त्यांचा कोरोना रिपोर्ट पॉझिटिव्ह आला होता. उपचारादम्यान त्यांच्या प्रकृतीत कोणतीही सुधारणा होत नव्हती. गुरुवारी सकाळी त्यांनी अखेरचा श्वास घेतला. अजित सिंह यांच्या मुलाने ट्विट करत निधनाची माहिती दिली आहे. जयंत चौधरी यांनी ट्वटिरला सोबत एक पोस्टदेखील शेअर केली आहे. यामध्ये त्यांनी म्हटलं आहे की, २० एप्रिलला अजित सिंह यांना कोरोनाची लागण झाली होती. शेवटच्या श्वासापर्यंत ते करोनाशी लढले आणि ६ मे रोजी शेवटचा श्वास घएतला. आपल्या संपूर्ण आयुष्यात अजित सिंह यांनी खूप प्रेम आणि सन्मान मिळवला.

चौधरी साहब नहीं रहे!
🙏🏽 pic.twitter.com/7cnLkf0c6K

— Jayant Singh (@jayantrld) May 6, 2021

अजित सिंह यांनी सर्वांना आपलं कुटुंब मानलं आणि नेहमी लोकांची चिंता करत राहिले. सध्याच्या करोना महामारीच्या काळात आपण सर्वांनी काळजी घ्यावी. शक्य असल्यास घराबाहेर पडू नका आणि सावधगिरी बाळगा. करोनाच्या या लढाईत डॉक्टरांना मदत मिळेल आणि हीच अजित सिंह यांना खरी श्रद्धांजली असेल, असेही जयंत चौधरी यांनी केलेल्या ट्विटमध्ये म्हटले आहे. दरम्यान, अजित सिंह बागपत येथून सहा वेळा खासदार म्हणून निवडून आले होते. याशिवाय केंद्रात त्यांनी नागरी उड्डाण मंत्रीपद भूषवलं होतं. राजकारणात येण्याआधी अजित सिंह अमेरिकेत नोकरी करत होते. १५ वर्ष तिथे नोकरी गेल्यानंर आपल्या वडिलांचा राजकीय वारसा पुढे नेण्यासाठी ते पुन्हा भारतात परतले होते. १९८६ मध्ये सर्वात प्रथम ते राज्यसभा खासदार म्हणून निवडून आले होते.