मुंबई: अभिनेते शरद पोंक्षे यांनी सोशल मीडियावर नुकतीच एक पोस्ट शेअर केली होती. यामध्ये त्यांनी आपल्या वैमानिक झालेल्या लेकीचे कौतुक करताना संवेदनशील अशा जातीच्या मुद्द्याला हात घातला होता. बॅकेचं कर्ज काढून,कोणतीही सवलत,आरक्षण नसताना केवळ मेहनत ,बुध्दीमत्ता ,परिश्रम व निष्ठा या जोरावर माझी मुलगी पायलट झाली, असे शरक्ष पोंक्षे यांनी म्हटले होते. यापैकी सवलत आणि आरक्षणाचा मुद्दा अनेकांना खटकला होता. त्यामुळे शरद पोंक्षे यांच्या या पोस्टवरुन सोशल मीडियावर उलटसुलट चर्चा सुरु होत्या. या वादात आता ठाकरे गटाच्या उपनेत्या सुषमा अंधारे यांनी उडी घेतली आहे. सुषमा अंधारे यांनी फेसबुक पोस्टच्या माध्यमातून जातीय आरक्षणावर टिप्पणी करणाऱ्या शरद पोंक्षे यांचा समाचार घेतला आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
तुम्ही ज्या आरक्षणाबद्दल प्रचंड तिरस्कृतपणाने लिहलत ना, , त्या आरक्षणाची लाभार्थी होणे मला सहज शक्य असताना सुद्धा माझं संपूर्ण शिक्षण मी खुल्या प्रवर्गातून पूर्ण केले आहे. आणि हो नुसतं पूर्ण केलं नाही तर विशेष प्राविण्यासह आणि विद्यापीठ राष्ट्रीय आणि आंतरराष्ट्रीय पातळीवरील तब्बल पाच सुवर्णपदकांसह पूर्ण केले आहे. त्यामुळे आरक्षण लाभार्थी होणे शक्य असतानाही ते नाकारण्याची हिंमत जर मी करू शकत असेल तर तुमच्यासारख्या माणसाला (?) आरसा दाखवण्याची हिंमत मी करूच शकते. अहो शरदराव कुणी कोणत्या जातीत जन्माला यावे यासाठी कुठेही अर्ज केलेला नसतो हे माहीत असेलच तुम्हाला त्यामुळे जी गोष्ट मिळवण्यामध्ये आपले कसलेही स्वकर्तृत्व नाही त्याची जशी लाज असू नये तसा माजही असू नये याचं भान असेलच तुम्हाला, अशी टिप्पणी सुषमा अंधारे यांनी केली आहे.
माणसा माणसात भेद निर्माण करणारा जो सनातनी धर्म तुम्ही सांगत आहात तो कदाचित मला मान्य होणार नाही आणि प्रबोधनकारांनी किंवा शिवसेनेचे संस्थापक बाळासाहेब यांनी किंवा शिवसेना पक्षप्रमुख उद्धव साहेब सांगत असलेले सर्व समावेशक हिंदुत्व तुम्हाला कळणार नाही. माझ्या राजकीय कारकीर्दीला अर्थात मी शिवसेनेत प्रवेश केला या घटनेला एक वर्ष पूर्ण होत आहे. मला कुठलीही राजकीय पार्श्वभूमी नाही. ना कुठलं जातीय किंवा आर्थिक पाठबळ आहे. पण कुठल्याही जातीय आर्थिक आरक्षणाशिवाय माझ्या गुणवत्तेने मी काय करू शकते हे एक वर्षात तुमच्यासह महाराष्ट्राने बघितलंच आहे. अर्थात् कुठलेही जातीय आर्थिक किँवा वांशिक निकष न लावता निव्वळ माझ्यातल्या गुणवत्तेची पारख करत मला राज्यभर काम करण्याची संधी देणारे सन्माननीय पक्षप्रमुख उद्धव साहेबांचा मानवतावादी दृष्टिकोनही तितकाच महत्त्वाचा आहे. पण हे तुमच्यासारख्या माणूसद्वेष्ट्यांना अजिबात कळणार नाही, अशी टीका सुषमा अंधारे यांनी केली आहे.
आजारपणाच्या काळात ते कोणत्या जातीचे होते, हे माहिती होतं का? सुषमा अंधारेंचा पोंक्षेंना सवाल
शरद राव तुम्ही एका दुर्धर आजारातून बरे झालात. पण या आजारा दरम्यान उपचार घेत असताना रक्त लघवी तपासण्याचे ठिकाण असेल, मेडिकल स्टोअरवर काम करणारी मुलं असतील, शस्त्रक्रिया दरम्यान आवश्यकता असणारे भुलतज्ञ , केमोथेरपी देणारे डॉक्टर्स, रक्ताची गरजच पडली असेल तर रक्तपेढीत काम करणारे कर्मचारी किंवा दिवस रात्र सेवा करणाऱ्या नर्सेस यांच्या जाती तुम्हाला माहीत होत्या का हो…, असा सवाल सुषमा अंधारे यांनी शरद पोंक्षेंना विचारला आहे. यावर आता शरद पोंक्षे काही प्रतिक्रिया देणार का, याकडे सर्वांच्या नजरा लागल्या आहेत.
शरद पोंक्षे नेमकं काय म्हणाले?
कु.सिध्दी शरद पोंक्षे आज पायलट झाली. ईयत्ता ४ पासून तिने पाहीलेलं स्वप्न पूर्ण झालं. अत्यंत खडतर परिस्थितीतून,माझं आजारपण,करोना, लॉकडाऊन, आर्थिक स्थिती बिकट हे सगळे अडथळे पार करत. बॅकेचं कर्ज काढून,कोणतीही सवलत,आरक्षण नसताना केवळ मेहनत ,बुध्दीमत्ता ,परिश्रम व निष्ठा या जोरावर ती पायलट झाली. बापाला आणखी काय हवं नाही का? आज अभिमान अभिमान फक्त अभिमान वाटतोय तुझा सिध्दी. मोठी हो पुढे देशाची सेवा कर. उत्तम सेवा दे. करशिलच खात्रीच आहे. लव्ह यू बाळा.
