नवी दिल्ली : कोरोना पॉझिटीव्ह रुग्णांच्या बाबतीत सर्वोच्च न्यायालयाने महत्त्वाचा निर्णय घेतला आहे. कोरोना पॉझिटीव्ह रुग्णांच्या घराबाहेर पोस्टर लावू नका. पोस्टर लावल्याने संबधित रुग्णांना अस्पृश्तेची वागणूक मिळत असल्याचे निदर्शनास आल्यामुळे न्यायालयाने हा निर्णय घेतला आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
कोरोना रुग्णाच्या घराबाहेर अशाप्रकारे पोस्टर लावण्याचा प्रकार बंद करण्यासाठी सर्वोच्च न्यायालयात याचिका दाखल करण्यात आली होती. त्यावर कोरोना पॉझिटीव्ह रुग्णांच्या घराबाहेर पोस्टर लावू नका, असा आदेश सर्वोच्च न्यायालयाचे न्यायाधीश अशोक भूषण यांच्या खंडपीठाने राज्य सरकारांना दिला आहे. तसेच, केंद्राने आपल्या नियमावलीत अशाप्रकारे कोरोना रुग्णाच्या घरावर पोस्टर लावण्याबाबत कुठेही उल्लेख केला नाही. मात्र, आपत्ती निवारण अधिनियमाअंतर्गत अधिकाऱ्यांमार्फत विशिष्ट प्रकरणातच कोरोना रुग्णाच्या घरासमोर सूचना फलक लावला जाऊ शकतो, असं सर्वोच्च न्यायालयाने आपल्या आदेशात नमूद केलं आहे.
दरम्यान, कोरोना महामारीच्या सुरवातीपासूनच प्रतिबंधात्मक उपाय म्हणून घरातील एखाद्या व्यक्तीचा कोरोना अहवाल पॉझिटिव्ह आल्यानंतर त्याच्या घराबाहेर पोस्टर लावण्यात येते. त्यामुळे संबंधित घरातील नागरिकांना अस्पृश्याप्रमाणे वागणूक मिळत असल्याच्या तक्रारी समोर आल्या आहेत. अशी वागणूक मिळणे ही अतिशय गंभीर बाब असल्याचं सर्वोच्च न्यायालयाने म्हटलं आहे. तसेच, असं करण्यामागे कोरोना रुग्णाला इजा किंवा त्याची मानहानी करण्याचा कोणताही हेतू नव्हता असं सरकारने स्पष्ट केलं आहे. तसेच अशाप्रकारे पोस्टर लावण्यामागे अन्य लोकांची सुरक्षा हाच उद्देश असल्याचंही केंद्रानं म्हटलं आहे.
