अकोला : नऊ वर्षीय लहान मुलाला पतंगाचं आमिष दाखवून निर्जनस्थळी नेलं. त्यानंतर त्याच्यावर अनैसर्गिक अत्याचार करून झाल्यानंतर बालकाला सोडून दिले. अकोल्यात ही धक्कादायक घटना घडली होती. आता अत्याचार करणाऱ्या नराधमाला अकोला जिल्हा न्यायालयाने २० वर्ष कारावासाची शिक्षा सुनावली आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
आकाश अशोक खोडे (वय ३० वर्ष, राहणार पातुर जि. अकोला) असं शिक्षा झालेल्या आरोपीचे नाव आहे. अकोल्याचे अतिरिक्त जिल्हा व सत्र न्यायाधीश एस. पी. गोगरकर यांनी आरोपी आकाश अशोक खोडे याला कलम ३७७ व कलम ३, ४ पोक्सो कायद्या अंतर्गत दोषी ठरवून शिक्षा सुनावली आहे.
नेमकी काय आहे संपूर्ण घटना?
मिळालेल्या माहितीनुसार २८ सप्टेंबर २०१८ रोजी सायंकाळी ६ वाजताच्या दरम्यान फिर्यादीचा मुलगा अंदाजे वय ९ वर्ष हा बाहेर खेळायला जातो म्हणून घरुन निघून गेला. त्यानंतर इस्त्रीच्या दुकानावर दोन माणसे उभी होती, त्यापैकी एका माणसाने तुला झाडाला अडकलेली पतंग काढून देतो असे म्हणून ढोर दवाखान्यामध्ये एका खोलीमध्ये त्या मुलाला घेऊन गेला. अन् शौचालयमध्ये नेऊन अल्पवयीन मुलासोबत अनैसर्गिक संभोग केला.
एवढेच नव्हे तर त्या मुलाला हा प्रकार कोणाला सांगितल्यास जीवे मारण्याची धमकी दिली. दरम्यान, त्याच दिवशी रात्री साडे ७ वाजता पीड़ित अल्पवयीन मुलगा घरी रडत रडत घरी आला अन् घडलेला प्रकार घरच्यांना सांगितला. लागलीच कुटुंबीयांनी पातूर पोलीस स्टेशनला फिर्याद दाखल केली. या फिर्यादीवरुन आरोपीविरुद्ध कलम ३७७ तसेच पोक्सो कायद्याच्या कलम ४, ७ नुसार गुन्हा दाखल करण्यात आला. या गुन्हयाचा तपास पूर्ण झाल्यावर न्यायालयात आरोपीविरुध्द दोषारोप पत्र सादर केले.
अशी झाली शिक्षा-
या प्रकरणामध्ये सरकार पक्षातर्फे गुन्हा एकुण १२ साक्षीदार तपासले. सरकार पक्षाचा पुरावा ग्राह्य समजून न्यायालयाने आरोपी आकाश खोड़े याला कलम ३, ४ पोक्सो कायद्यासह कलम ३७७ अंतर्गत दोषी ठरवून २० वर्ष सश्रम कारावासाची शिक्षा आणि १० हजार रूपये दंड अशी शिक्षा सुनावली. तसेच दंड न भरल्यास अतिरिक्त ३ महिने साधी कारावासाची शिक्षा सुनावली.
या प्रकरणात अतिरिक्त सरकारी वकील शितल दिपक भुतडा यांनी सरकार पक्षाची बाजू मांडली. तर पैरवी अधिकारी हे. कॉ. रत्नाकर बागडे व एल. सील. सोन आहे यांनी सहकार्य केले. तसेच तपास अधिकारी व्ही. एस. महाले यांनी सुद्धा सहकार्य केले.
