भोपाळ : मध्य प्रदेशचे माजी मुख्यमंत्री कमलनाथ यांच्यासह काँग्रेस नेत्यांनी भरलेली लिफ्ट १० फूट खाली कोसळली असून कमलनाथ आणि काँग्रेस नेते थोडक्यात बचावले आहेत. दुर्घटनेनंतर लिफ्टचे दरवाजे उघडत नसल्याने इंजिनिअरला बोलावण्यात आलं होतं. सुदैवाने या दुर्घटनेत कोणीही जखमी झालं नाही. काँग्रेसने ही सुरक्षेतील खूप मोठी त्रुटी असल्याचा आरोप केला आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
कलमनाथ आणि इतर नेते माजी मंत्री रामेश्वर पटेल यांना भेटण्यासाठी इंदूरमधील एका खासगी रुग्णालयात गेले होते. यावेळी काँग्रेस नेते सज्जन सिंग वर्मा आणि जितू पातवारी त्यांच्यासोबत होते. रुग्णालयात पोहोचल्यानंतर काँग्रेस नेत्यांनी लिफ्टचा वापर केला. मात्र यावेळी लिफ्टमध्ये बिघाड झाल्याचं निदर्शनास आलं. जेव्हा कलमनाथ आणि इतर नेते वरच्या मजल्यावर जाण्यासाठी लिफ्टमध्ये शिरले, त्यावेळी लिफ्ट वर जाण्याऐवजी थेट १० फूट खाली कोसळली.
दुर्घटनेनंतर कमलनाथ यांच्या सुरक्षारक्षकांनी धाव घेतली. यावेळी लिफ्टचे दरवाजे उघडले जात नव्हते. सुदैवाने या दुर्घटनेत कोणीही जखमी झालं नाही. दुर्घटनेची माहिती मिळताच मुख्यमंत्री शिवराज सिंग चौहान यांनी कमलनाथ यांची फोन करुन चौकशी केली. शिवराज सिंग चौहान यांनी ट्विट करत याप्रकरणी जिल्हाधिकाऱ्यांना चौकशीचे आदेश दिले आहेत.
