कोल्हापूर : कोल्हापूर महापालिकेच्या निवडणुकीचे रणशिंग फुंकले आहे. त्यामुळे प्रत्येक पक्षाने कारभारी अन् सूत्रधार नेमले आहेत. कोल्हापूर महापालिकेच्या निवडणुकीची रणधुमाळी सुरू झाली आहे. प्रभाग आरक्षण जाहीर झाल्याने इच्छुक उमेदवारांनी भागाभागात नवर्षाच्या शुभेच्छा देत आपली उमेदवारीच जाहीर केली आहे. प्रशासक नियुक्तीपूर्वी या महापालिकेत महाविकास आघाडीची सत्ता होती. गतवेळीप्रमाणेच यावेळी आघाडीतील सर्व पक्ष स्वतंत्र लढण्याची चिन्हे आहेत. पालकमंत्री सतेज पाटील यांनी तशी घोषणाही केली आहे. निवडणुकीनंतर पुन्हा काँग्रेस, राष्ट्रवादी व शिवसेनेची युती होण्याची शक्यता आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
आरक्षण जाहीर झाल्याने प्रत्येक पक्ष सध्या प्रभागात तगडा उमेदवार शोधत आहे. हे काम नेत्यांनी कारभारी मंडळींच्यावर सोपवले आहे. काँग्रेसचे सर्व सूत्रे पालकमंत्री पाटील, आमदार चंद्रकांत जाधव, ऋतुराज पाटील यांच्या हातात असली तरी त्यांना सध्या सहा कारभारी मदत करत आहेत.
राष्ट्रवादीचा मुख्य भार हा ग्रामविकास मंत्री हसन मुश्रीफ यांच्यावर आहे. राज्याचा भार सांभाळत या निवडणुकीत पूर्ण वेळ देणे शक्य नसल्याने त्यांनीदेखील काही कारभाऱ्यांना कामाला गुंतवले आहे. भाजप आणि ताराराणी आघाडीला बहूमत मिळवून देण्यासाठी प्रदेशाध्यक्ष चंद्रकांत पाटील अनेक इच्छुकांच्या भेटीगाठी घेत आहेत. त्यांनी या निवडणुकीची मुख्य सूत्रे माजी खासदार धनंजय महाडिक व देवस्थान समितीचे अध्यक्ष महेश जाधव यांच्याकडे सोपवली आहेत. त्यांच्यासह अमल महाडिक यांच्या नेतृत्वाखाली कारभारी मंडळीची टिम कार्यरत झाली आहे.
शिवसेनेतील धूसफूस कायम आहे. यामुळे सर्व प्रभागात उमेदवार उभे करण्याबाबत काहीच नियोजन सध्या तरी दिसत नाही. खासदार प्रा. संजय मंडलिक, राज्य नियोजन मंडळाचे कार्याध्यक्ष राजेश क्षीरसागर, जिल्हाप्रमुख संजय पवार, विजय देवणे, शहरप्रमुख रविकिरण इंगवले हे शिवसेनेची सूत्रे हलवत आहेत.
कारभारी आणि सूत्रधार
काँग्रेस : शारंगधर देशमुख, सचिन चव्हाण, मोहन सालपे, सुभाष बुचडे, तौफिक मुलाणी, राजू साबळे
राष्ट्रवादी काँग्रेस : आर. के. पोवार, राजेश लाटकर, अदिल फरास, उत्तम कोराणे, विनायक फाळके
भाजप, ताराराणी, जनसुराज्य आघाडी : सुहास लटोरे, प्रा. जयंत पाटील, राहूल चिकोडे, सत्यजित कदम, सुनिल कदम
शिवसेना : रविकिरण इंगवले, शिवाजी जाधव
