पुणे: पुण्याच्या राजकारणात एकेकाळी प्रचंड दबदबा असणारे काँग्रेसचे माजी नेते सुरेश कलमाडी यांनी पुणे महानगरपालिका निवडणुकीपूर्वी भाजपशी जवळीक वाढवण्यास सुरुवात केल्याचे दिसत आहे. त्यामुळे आगामी पुणे महानगरपालिका निवडणुकीत भाजप (BJP) आणि कलमाडी यांची हातमिळवणी होणार असल्याच्या चर्चांनी जोर धरला आहे. यासाठी निमित्त ठरला आहे तो, सुरेश कलमाडी (Suresh Kalmadi) यांचा पुणे फेस्टिव्हल. या सोहळ्याचे शुक्रवारी उद्घाटन होणार आहे. पुणे फेस्टिव्हलच्या उद्घाटनासाठी भाजपचे केंद्रीय मंत्री नितीन गडकरी, उपमुख्यमंत्री देवेंद्र फडणवीस, चंद्रकांत पाटील आणि मंगलप्रभात लोढा, हे बडे नेते उपस्थित राहणार आहेत. त्यामुळे पुण्यात कलमाडी आणि भाजपच्या जवळकीची चांगलीच चर्चा रंगली आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
२०११ साली झालेल्या राष्ट्रकुल स्पर्धेतील घोटाळाप्रकरणामुळे सुरेश कलमाडी यांच्या राजकीय कारकीर्दीला ग्रहण लागले होते. त्यामुळे एकेकाळी पुणे आणि महाराष्ट्राच्या राजकारणात दबदबा असणाऱ्या सुरेश कलमाडी यांची राजकीय इनिंग अचानक संपुष्टात आली होती. काँग्रेसने सुरेश कलमाडी यांना सहा वर्षांसाठी पक्षातून निलंबित केले होते. मात्र, आता १० वर्षे उलटूनही काँग्रेसने सुरेश कलमाडी यांना लांब ठेवले आहे. सुरेश कलमाडी यांच्याविरुद्धचा खटला अजूनही सुरु असल्याने त्यांचे राजकीय पुनर्वसन होऊ शकले नव्हते. त्यामुळे आता सुरेश कलमाडी यांनी स्वत:वरील कलंक धुवून काढण्यासाठी भाजपच्या वॉशिंग मशीनमध्ये जाऊन ‘पावन’ होण्याचा मार्ग स्वीकारला आहे का, अशी चर्चा आता रंगू लागली आहे.
काही दिवसांपूर्वीच राज्यात सत्तांतर झाले होते. त्यावेळी शिवसेनेतून फुटून बाहेर निघालेल्या शिंदे गटातील भ्रष्टाचाराचे आरोप असलेल्या आमदारांना भाजपने एकप्रकारे पावन करुन घेतले होते. त्याच धर्तीवर सुरेश कलमाडी भाजपमध्ये गेल्यास त्यांच्यावरील राजकीय कलंक कायमचा पुसला जाऊ शकतो. गेल्या काही वर्षांमध्ये सुरेश कलमाडी हे राजकारणात तितकेसे सक्रिय नसले तरी ते काहीप्रमाणात आपली राजकीय ताकद राखून आहेत.
सुरेश कलमाडी भाजपसाठी फायदेशीर ठरणार?
एक काळ होता जेव्हा कलमाडी म्हणजे पुणे आणि पुणे म्हणजे कलमाडी हे समीकरण होते. पुणे महापालिका कलमाडी गटाच्या ताब्यात होती. एवढंच काय तेव्हा पुण्यात निर्णय देखील कलमाडी हाऊसमधूनच व्हायचा. कर्वेरोडला लागून असलेलं दोन मजली कलमाडी हाऊस म्हणजे सत्तेचं केंद्रच होतं. कार्यकर्ते तिथं जमायचे. कलमाडी विमानतळावर यायचे तेव्हा त्यांच्या स्वागताला जणू जत्रा भरायची. कलमाडी आपल्या केबिनमध्ये झुलत्या खुर्चीत बसून सूत्र हलवायचे. तिथूनच पदांचे वाटप व्हायचे, असा तो काळ. कलमाडींचा पुणे फेस्टिव्हल म्हणजे डोळे दीपवणारा अनुभव असायचा. हेमा मालिनीपासून अमरीश पुरींपर्यंत ते गुरुदास मानपासून जगजितसिंग पर्यंत सगळे तिथं यायचे. आजदेखील कलमाडी हे पुण्याच्या राजकारणात आपला प्रभाव राखून आहेत. त्यामुळे पुणे महानगरपालिका निवडणुकीच्या तोंडावर कलमाडी पक्षात आल्यास भाजपला निश्चितच फायदा होऊ शकतो.
