मुंबई : महाराष्ट्र नवनिर्माण सेनेचे पदाधिकारी जमील शेख यांच्या हत्येप्रकरणात ठाण्यातील राष्ट्रवादीचे पदाधिकारी आणि नगरसेवक नजीब मुल्ला यांचं नाव समोर आलं आहे. यावरून मनसेचे प्रमुख राज ठाकरे यांनी राष्ट्रवादीचे प्रमुख शरद पवार यांना ललकारले आहे. राज यांनी खुनाचं उत्तर खुनानं चांगलं दिसणार नाही, असे म्हटले आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
मनसेचे पदाधिकारी जमील शेख यांची हत्या करण्यात आली होती. या प्रकरणावर आज झालेल्या पत्रकार परिषदेत बोलताना राज ठाकरे यांना संताप अनावर झाला. माझे पक्षातील सहकारी जमील शेख यांची हत्या झाली. या हत्या प्रकरणाचा पोलिसांकडून उत्तर प्रदेशपर्यंत तपास करण्यात आला. यावेळी काही आरोपींना अटक करण्यात आली. आरोपींनी कबुली जबाब दिला असून, यात राष्ट्रवादीचे नगरसेवक नजीब मुल्लांचं नाव आलं आहे. उत्तर प्रदेश पोलिसांची प्रेसनोट आहे. त्यामध्ये नजीम मुल्लांचं नाव आहे. नजीब मुल्ला यांनीच जमील शेख यांची हत्या करण्याची सुपारी दिली होती, असं या प्रेसनोटमध्ये म्हटलेलं आहे. सत्ताधारी पक्षाचे लोक दिवसाढवळ्या लोकांना मारत आहेत. याच नजीम मुल्लांचं नाव सूरज परमार बिल्डर आत्महत्या प्रकरणात आलं होतं. ती केसही रफादफा झाली. आता पुन्हा नाव आलं आहे. आता राज्य सरकार काय करतंय हे पाहतोय, असं राज ठाकरे म्हणाले.
माझे पक्षातील सहकारी जमील शेख ह्यांच्या हत्या प्रकरणात राष्ट्रवादीचा पदाधिकारी नजीम मुल्ला ह्याचं नाव आलं आहे. ह्याच पदाधिकाऱ्यांचं नाव सुरज परमार हत्या प्रकरणातही आलं होतं. ह्याप्रकरणी राज्य सरकारने लक्ष घालावं. #RajThackerayLive
— MNS Adhikrut – मनसे अधिकृत (@mnsadhikrut) April 6, 2021
राज पुढे म्हणाले, या प्रकरणी शरद पवार यांची भेट घेणार आहे. अशी मंडळी त्यांना सांभाळायची असतील, तर दुसऱ्यांचे हातही बांधलेले नसतात. खुनाचे उत्तर खुनाने अशा गोष्टी महाराष्ट्रात सुरु झाल्या, तर हे चित्र चांगलं दिसणार नाही. नजीब मुल्ला याच्यावर कारवाई आणि शिक्षा होणं आवश्यक आहे, त्यासाठी शरद पवारांची भेट घेणार आहे, अशी माहिती राज यांनी दिली.
