मुंबई : ख्यातनाम नृत्यकार पद्मश्री आस्ताद देबू यांचे निधन झाले आहे. ते ७३ वर्षाचे होते. मुंबईतील राहत्या घरी त्यांनी अखेरचा श्वास घेतला. आधुनिक आणि जुन्या काळातील भारतीय नृत्यशैलींचा मेळ घालून नव्या पिढीसमोर एक वेगळी नृत्यशैली सादर करणाऱ्या देबू यांनी तब्बल पाच दशके रसिकांच्या मनावर अधिराज्य गाजवले. कथक आणि कथकली हे दोन शास्त्रीय नृत्यप्रकारांचा संगम साधत एका अनोख्या नृत्यशैलीची निर्मिती त्यांनी केली होती.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
गुजरातच्या नवसारीमध्ये १३ जुलै १९४७रोजी आस्तात देबू यांचा जन्म झाला. गुरू प्रल्हाद दास यांच्याकडून त्यांनी कथक नृत्याचे शिक्षण घेतले. गुरू ई. के. पनिक्कर यांच्याकडून कथकली या शास्त्रीय नृत्याचे शिक्षण घेतले. कलेची सेवा करीत त्यांनी तब्बल ७० देशांत आपले दमदार नृत्य पेश केले. आस्ताद देबू यांनी हिंदी सिनेसृष्टीमध्येही आपल्या कलेची छाप उमटवली. निर्माते मणिरत्नम, विशाल भारद्वाज यांसारख्या दिग्गजांसोबत त्यांनी काम केले आहे. प्रसिद्ध चित्रकार एम. एफ. हुसैन यांच्या ‘मीनाक्षी : ए टेल ऑफ थ्री सिटीज’ या सिनेमासाठी त्यांनी नृत्य दिग्दर्शनही केले होते. १९९५ मध्ये त्यांना संगीत नाटक अकादमी पुरस्कराने सन्मानित करण्यात आले होते, तर २००७ मध्ये आस्ताद देबू यांना पद्मश्री पुरस्काराने गौरवण्यात आले.
आस्ताद देबू यांच्या कुटुंबीयांनी सोशल मीडियाच्या मार्फत देबू यांच्या निधनाची बातमी दिली. गेल्या काही दिवसांपासून ते आजारी होते. ‘आपल्या अविस्मरणीय नृत्यांच्या वारसा मागे सोडून त्यांनी जगाचा निरोप घेतला. आपल्या सुंदर नृत्यशैलीतून प्रेक्षकांच्या मनात त्यांनी आपली एक वेगळी ओळख निर्माण केली होती. त्यांच्या जाण्याने मित्रमंडळी, देश-विदेशातील शास्रीय आणि आधुनिक नृत्यातील सगळ्या कलाकारांसाठी मोठी पोकळी निर्माण झाली आहे. ईश्वर त्यांच्या आत्म्यास शांती देवो. त्यांची उणीव आम्हाला कायम जाणवेल,’ असे त्यांच्या कुटुंबीयांनी म्हटले आहे.
