रावळपिंडी : आतापर्यंत क्रिकेटच्या इतिहासात जे कोणत्याही संघाला जमलं नाही ते इंग्लंडने पहिल्याच दिवशी करून दाखवलं आहे. पाकिस्तानविरुद्धच्या पहिल्या कसोटीच्या पहिल्याच दिवशी इंग्लंडने नवा इतिहास रचला आहे.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
कसोटी क्रिकेटमध्ये टी-२० क्रिकेटचा तडका आज पाहायला मिळाला. कारण इंग्लंड आणि पाकिस्तान यांच्यातील पहिल्या कसोटीच्या पहिल्या दिवसाचा खेळ थांबला तेव्हा पाहुण्यांनी ७५ षटकांत ४ बाद ५०६ अशी दमदार मजल मारली. पण इंग्लंडने यावेळी एक मोठा विश्वविक्रम रचला आहे, जो आतापर्यंत कोणालाही रचता आलेला नाही.
इंग्लंडच्या संघाने पहिल्याच दिवशी पाकिस्तानच्या गोलंदाजांना लोटांगण घालायला भाग पाडले. इंग्लंडच्या संघाने पहिल्याच दिवशी पाकिस्तानच्या गोलंदाजीची चांगलीच धुलाई केली. कारण इंग्लंडला यावेळी तब्बल दोनशे धावांची दमदार सलामी मिळाली. इंग्लंडच्या झॅक क्रॉवले आणि बेन डकेट या सलामीवीरांनी यावेळी तब्बल २३३ धावांची भागीदारी रचली. या दोघांनीही आपली शतके झळकावत इंग्लंडच्या संघाला झोकात सुरुवात करून दिली. झॅकने यावेळी १११ चेंडूंत २१ चौकारांच्या जोरावर १२२ धावांची धडाकेबाज खेळी साकारली. त्याचबरोबर डकेटने यावेळी झॅकला चांगली साथ दिली आणि त्याने ११० चेंडूंत १५ चौकारांच्या जोरावर १०७ धावांची खेळी साकारली.
इंग्लंडचे खेळाडू फक्त एवढ्यावर थांबले नाहीत तर त्यानंतर अजून दोन फलंदाजांनी यावेळी शतकं झळकावली. ऑली पॉपने यावेळी १०४ चेंडूंत १०८ धावांची खेळी पूर्ण केली, तर हॅरी ब्रुक्सने यावेळी झुंजार शतकी खेळी साकारली. कसोटी सामन्याच्या पहिल्याच दिवशी तब्बल चार शतकं झळकावण्याचा विश्वविक्रम आता इंग्लंडच्या नावावर जमा झाला आहे. कारण यापूर्वी कोणत्याही संघातील चार खेळाडूंना सामन्याच्या पहिल्या दिवशी शतकं झळकावता आली नव्हती. त्यामुळे हा विश्वविक्रम आता इंग्लंडच्या नावावर जमा झाला आहे. त्याचबरोबर इंग्लंडने यावेळी चार शतकांच्या जोरावर तब्बल ११२ वर्षांपूर्वी विश्वविक्रम मोडीत काढला आहे. कसोटीच्या सामन्याच्या पहिल्या दिवशी सर्वाधिक धावा करण्याचा विश्वविक्रम यावेळी ऑस्ट्रेलियाच्या नावावर होता. यापूर्वी ऑस्ट्रेलियाने दक्षिण आफ्रिकेविरुद्ध खेळत असताना १९१० साली ६ फलंदाज गमावत ४९४ धावा केल्या होत्या. त्यामुळे इंग्लंडने पहिल्याच दिवशी ५०० धावांचा डोंगर ओलांडत एक नवा विश्वविक्रम आता प्रस्थापित केला आहे. त्यामुळे आता या कसोटीच्या दुसऱ्या दिवशी इंग्लंडचा संघ किती धावा करतो, याची उत्सुकता सर्वांनाच असेल. त्यामुळे या कसोटी सामन्यावर आता क्रिकेट विश्वाचे लक्ष लागलेले असेल.
