नवी दिल्ली : सीरम इन्स्टिट्यूट ऑफ इंडियाला न्यायालयाचा मोठा दिलासा मिळाला आहे. सीरमने तयार केलेल्या कोविशिल्ड या करोना लसीच्या ट्रेडमार्कवरुन वाद निर्माण झाला होता. या विरोधात दाखल याचिका पुण्याच्या सत्र न्यायालयाने फेटाळून लावली आहे. त्यामुळे सीरमला दिलासा मिळाला असून कंपनीच्या लसीचे कोविशिल्ड हे नाव कायम राहणार आहे. कुटिस बायोटेक या कंपनीने सीरम विरोधात कोर्टात याचिका दाखल केली होती.
गल्ली ते ग्लोबल सर्व गोष्टी जाणून घेण्यासाठी ई-चावडीच्या फेसबुक पेजला लाइक करा
कुटिस बायोटेकने ४ जानेवारी रोजी दाखल याचिकेत म्हटलं होतं की, कंपनीने सीरमच्या आधीच कोविशिल्ड या नावाचा वापर केला आहे. त्यामुळे आमच्याकडेचं हे नाव वापरण्याचा अधिकार आहे. यावर सीरमने आपली बाजू मांडताना कोर्टाला सांगितलं की, दोन्ही कंपन्या भिन्न उत्पादन श्रेणीमध्ये काम करतात, त्यामुळे ट्रेडमार्कवरुन भ्रम निर्माण होण्याचे कारण नाही.
अॅड. हितेश जैन यांनी सीरमची बाजू न्यायालयात मांडली. दोन्ही बाजूंचा युक्तीवाद ऐकून घेतल्यानंतर कोर्टाने कुटिस बायोटेकची याचिका फेटाळून लावली. मात्र, या कंपनीने कोर्टाच्या निर्णयाविरोधात हायकोर्टात अपील करण्याचा निर्णय घेतला आहे. दरम्यान, भारतात या वर्षाच्या सुरुवातीला सीरमच्या कोविशिल्ड आणि भारत बायोटेकच्या कोव्हॅक्सिन या दोन लसींना आपत्कालिन लसीकरणासाठी परवानगी देण्यात आली आहे.
